أفتكاسة

هريش خريش منتريش

شباب ضايع مش عارف يعيش

نفسه ياكل حمام و ينام علي ريش

نفسه يلاقي نفسه ولما يدور ميلقيش

حلمه الضايع مبينتهيش

نفسي أشكي بس العو ما يمسكنيش

نفسي أحكي حكاوي متتحكيش

نفسي أغني أغاني مبتتغنيش

نفسي أعبر أي سبني شوية يا شاويش

ده أنا بقول بحلم و النبي ما تحبسنيش

لا قلت عايز بنجو ولا حتت حشيش

أه يا بلد الحق فيكي ما يعيشنيش

نفسي أركب عبارة متغرقنيش

و أسكن في عمارة متوقعنيش

و أخد مرتب أقدر منه أكل و أعيش

و أدخل القسم و الحج جوة ما يهنيش

و أشرب مية ما تموتنيش

و أكل أكل ما يسمنيش

و أدخل جامعة ما تسقتنيش

و العفاربيت ما يستقصدونيش

و يكون فيه والي رجلته ما يسرقونيش

و الأتباع ما ينهبونيش

و العسس بتوعه عليه ما تفتريش

أنا طهقت بس كاتم و ساكت عشان العيون ماتشوفنيش

وعلي أمن الحجه ما يجرجرونيش

وهناك ما يعزبونيش

و بالعصاية ما يهددونيش

أه والنبي ما تكهربنيش

ده أنا غلبان و كاتم ما بشتكيش

و نفسي دماغي ما تمشيش

أي حال البلد عجبني أنا قلت ما عجبنيش؟؟

لا لأ أبوس أيدك و النبي ما تصدقنيش

أصلك يا حج والله ما تعرفنيش

ده أنا بخرف و مجنون و في الصح مليش

أبصم و أمضي و ماله بس سبني أعيش

و النبي الرحمة يا شاويش

أصبر عليا هو حتي في حق الحلم مليش؟؟؟

هو أيه ده كله كدة لأ و خلاص و مفيش؟؟

منك لله هو أنت عملك كده ما بينتهيش؟؟

خلاص ياعم نموت أحنا عشان أنتا تعيش

و أدينا سيبها و كلامك و رغيك ما يلزمنيش

يا عم فكك مني و شوف همومك ما بتتنتهيش

ألا و النبي رغيف عيش معاك ما ألاقيش؟؟

خلاص سيبهالك خضرة ما تنادينيش

وهحفر لية تربة مدام بلادنا ما تسعنيش

و هكتب عليها مات عشان مش عارف يعيش